Ef einn eða fleiri nemendur ná aldrei settum markmiðum getur það orðið til þess að hin börnin í hópnum verða pirruð á þeim, stríða þeim eða setja óhóflegan þrýsting á þá. Þá verður að breyta skilmálunum eða hætta að nota hópmiðaða skilmála.
Til að draga úr líkunum á neikvæðum afleiðingum hópmiðaðra styrkingarskilmála er hægt að beita eftirfarandi aðferðum:
- Það er mikilvægt að allir meðlimir hópsins hafi þá færni og getu sem þarf til að standast þau markmið sem eru sett. Það er því betra að nota hópmiðaða skilmála til að auka viðeigandi hegðun sem börnin eru þegar fær um að sýna og gefa frá sér í stað þess að kenna nýja hegðun. Með öðrum orðum ætti að nota hópmiðað inngrip þegar óviðeigandi hegðun er vegna þess að börnin skortir áhugahvöt en ekki þegar þau skortir færni og getu til að sýna viðeigandi hegðun.
- Það er mikilvægt að væntingar til barnanna séu raunhæfar og sanngjarnar. Það má þó auka kröfurnar sem eru gerðar smám saman.
- Passa þarf að umbuna fyrir viðeigandi hegðun í stað þess að refsa fyrir óviðeigandi hegðun. Það er, ef börnin haga sér vel fá þau eitthvað umfram það sem þau fá venjulega í stað þess að þau missi eitthvað sem þau yfirleitt fá.
- Þegar verðlaun fyrir hópinn eru valin þarf að hafa í huga að öllum börnunum þarf að finnast þau eftirsóknarverð. Ein ástæða þess að eitt eða fleiri börn reyna að eyðileggja fyrir hópnum er að afleiðingar þess að haga sér vel eru ekki nægjanlega eftirsóknarverðar fyrir tiltekið/n barn/börn eða að barninu finnst kröfurnar svo miklar að það treystir sér ekki til að reyna að ná þeim. Rannsóknir hafa sýnt að flestum börnum finnst frjáls tími eftirsóknarverður.
- Það er mjög mikilvægt að hrósa einstaka börnum og hópnum/hópunum þegar vel gengur bæði á meðan þau sýna viðeigandi hegðun og eftir að þau hafa náð settum markmiðum.
- Minnið börnin á afleiðingar þess að haga sér vel, til dæmis „Um leið og þú/þið… þá…”.
- Einnig ætti að forðast það að gefa úrslitakosti eins og að segja til dæmis „Ef þú gerir ekki… þá…”. Betra er í staðinn að minna á reglurnar og afleiðingar sem fylgja því að brjóta þær, tala með hlutlausum tón og að minna barnið á að það hefur valkosti.
- Það getur gerst að eitt eða fleiri börn reyna viljandi að eyðileggja fyrir hópnum með því að standa sig illa og koma þannig í veg fyrir að hópurinn fái umbun. Það er ekki vegna þess að viðkomandi skortir þá færni og getu sem þarf til að sýna viðeigandi hegðun heldur mögulega vegna þeirrar athygli sem hann fær fyrir óviðeigandi hegðun og valdinu sem slíkri hegðun fylgir. Í slíkum tilfellum væri hægt að setja reglu fyrir bekkinn um að ekki megi veita athygli fyrir slíka óviðeigandi hegðun og einnig þarf kennarinn að passa að veita henni ekki athygli. Þetta inngrip ætti að duga fyrir barn sem virðist viljandi skemma fyrir öðrum, ef innigripinu er gefinn nægur tími.
Ef börnunum er skipt upp í tvo eða fleiri hópa þarf að passa að skipta þeim þannig að börn sem eiga í góðum og jákvæðum samskiptum lenda saman í hóp og að börnin í hverjum hóp séu svipuð í getu og færni. – Börnin sem eiga í erfiðleikum geta þá verið í minnihluta í mismunandi hópum, eingöngu eitt slíkt barn í hverjum hóp.