Morningside Academy skólinn í Seattle, Washington í Bandarikjunum notar eingönguraunprófaðar kennsluaðferðir sem kenna rökhugsun, þrautalausnir, samvinnu og gagnrýna hugsun. Nemendur í skólanum vita alltaf hvers er ætlast af þeim dag hvern þar sem þeir hafa yfirlit yfir markmið og kennslu dagsins. Hegðunareglur skólans eru skýrar og safna nemendur stigum fyrir námsframmistöðu og góða hegðun. Í líkaninu felst að kenna, æfa og tækifæri til að beita nýja færni. Í fyrsta lagi eru nemendur settir í hópa eftir getu, en ekki aldri. Færni er skipt niður í færnibúta með innihaldsgreiningu sem er í takt við stýrða kennslu. Færni er þá brotin niður í minni einingar og síðan er metið hvaða færnieining er mikilvægust og hvaða eining er nauðsynleg til þess að hægt sé að kenna færnina alla. Þá er einnig ákveðið hvaða námsleið skal nota til þess að kenna færnina og hver útkoma hegðunar á að vera. Með námsleið er átt við á hvaða hátt nemandinn fær upplýsingar um hvað hann eigi að gera og á hvaða hátt á hann að fara eftir því sem honum er sagt. Til dæmis heyrir hann þær? eða les hann upplýsingarnar? Er svörun hans í formi skrifaðra eða talaðra orða? Námsleið gæti til dæmis verið heyra-skrifa þar sem nemandinn fær að heyra spurningu en á að svara á skriflegu formi. Kennslan í Morningside Academy þjálfar upp allar námsleiðir.
Ný færni er kennd með stýrðri kennslu. Þegar allir færnibútarnir eru lærðir og orðnir nákvæmir eru þeir settir saman og æfðir sem heild. Kennslan er hönnuð þannig að nemendur komast af kennslustigi í æfingarfasa eins fljótt og mögulegt er. Allt að 40% tímans eru nemendur í æfingarfasa og er fimiþjálfun notuð á þessu stigi. Nemendur æfa sig þá bæði einir og í samvinnu við aðra nemendur, t.d. í æfingarpörum. Nemendur skrá frammistöðu sína sjálfir, fylgjast með eigin árangri á hröðunarkortum og læra að setja sér sjálfum markmið og vinna sjálfstætt. Sett eru markmið um hversu há tíðni svörunar verður að vera til þess að teljast lærð, en þá er hún sett í viðhaldsskeið. Nemendur fá svo tækifæri til þess að nota færnina í nýjum aðstæðum, til dæmis í leik.
Færni nemenda er sífellt metin svo nemendur séu í viðeigandi kennsluhópi. Það hversu vel og nákvæmlega nemendum er raðað í hópa hefur mikil áhrif á það hversu hratt nemendur læra hverja færniseiningu. Tvisvar á ári eru því notuð stöðluð próf til að athuga færni nemenda, námskrá hóps er skoðuð einu sinni í viku (CBM), daglegar mælingar á tíðni svörunar fara fram með fimiþjálfun auk þess sem kennarinn hefur augun alltaf opin fyrir því hvort nemendur geti fylgt leiðbeiningum í kennslu því ef þeir geta það ekki eiga þeir sennilega ekki heima í hópnum. Í lok hvers dags fer síðan kennari yfir frammistöðu nemenda þar sem hver nemandi hittir kennara einslega. Nemandinn fær umsögn með sér heim sem á stendur hvernig gekk í skólanum hvern dag.
CBM er skammstöfun fyrir ,,Curriculum-Based Measurement” eða námskrártengt mat. Í því eru stöðluð próf sem notuð eru til þess að meta árangur nemanda með reglubundnum mælingum, t.d. vikulega eða á hálfsmánaðarfresti allt skólaárið. Með þessu mati er reynt að koma í veg fyrir að nemendur missi af þjálfun í einhverri færni svo að nemendur lendi ekki í vandræðum seinna í námi sínu þegar ný færni er byggð á þeirri sem vantar. Stöðluðu prófin eru gefin út af bókaútgefanda og eru byggð á áratuga reynslu um frammistöðu margra milljóna barna. Þau eru stutt og miða við þaðnámskrá sem er í gildi hverju sinni. Öll prófin sem lögð eru fyrir á einu ári eru sambærileg en eftir því sem kennslan afgreiðir fleiri þætti námskrásins því meira sem nemendur eiga að geta svarað í prófinu og í lok ársins eiga þeir að geta svarað allt prófið. Prófin á að leggja fyrir reglulega svo mögulegt sé að fylgjast enn betur með þróun færni nemandans og byggja á þessum niðurstöðum til þess að bæta árangur bekkjarins í heild. Einnig til að reglulega meta hvort kennslan er að skila árangri í hverjum þætti sem er kenndur yfir skólaárið.
Morningside líkanið hefur verið notað í skólum allt frá árinu 1991 og hafa rannsóknir á notkun líkansins í kennslu sýnt fram á að þessi kennslutækni sé sérstaklega áhrifarík. Nemendur ná til dæmis að læra lestur á einu ári sem jafnast á við 2,5 ár í hefðbundnum skólum og læra stærðfræði á einu ári sem jafnast á við 3 ár í hefðbundnum skóla.