Sé mikill munur á greindarvísitölu barns og frammistöðu þess í námi telst það vera með sértæka námsörðugleika. Sum börn með námsörðugleika hafa einhvers konar skerðingu á taugastarfssemi. Oft er talað um sértæka námsörðugleika í lestri, stafsetningu, skrift, stærðfræði og jafnvel félagsfærni. Önnur eiga erfitt með nám vegna erfiðra aðstæðna, vanlíðunar í skólaumhverfinu eða fjölskylduaðstæðna eins og fátækt, ofdrykkja eða ofbeldi. Þriðji hópurinn hefur ekki þá kunnáttu sem þau ættu að hafa vegna þess að þau hafa misst af að læra grunnfærni vegna veikinda, skorts á æfingu, óviðeigandi kennsluaðferða, vanrækslu á heimilinu eða einhvers annars.
Ef barn dregst aftur úr í námi er mikilvægt að bregðast fljótt við, ekki bíða í vikur, mánuði eða ár. Fyrir utan aðgerðir í skóla og heima er gott að leita til fagfólks þjónustumiðstöðvar eða skólaskrifstofu.
Mikilvægt er að greina orsakir vandans en allir með námsörðugleika eiga það sameiginlegt að þurfa á æfingu að halda á viðeigandi færnistigi. Greina þarf nákvæmlega hvað barnið kann og hvað ekki og þjálfa sérstaklega það sem það á í erfiðleikum með.
Ekki er hjálplegt að þurfa að kljást við námsefni eða próf sem er langt fyrir ofan núverandi getu. Það er skaðlegt fyrir sjálfsmynd einstaklingsins að upplifa stöðuga ósigra og óöryggi um eigin getu. Stundum er erfitt að sníða nám að þörfum einstaklingsins en það er þó skylda skólans samkvæmt gildandi aðalnámsskrá fyrir grunnskóla. Öll börn eiga rétt á því að fá kennslu við hæfi.