Hver og einn skóli hefur sínar verklagsreglur um tilvísunar- og greiningarferli. Ef starfsfólk skóla hefur áhyggjur af tilteknum nemanda er yfirleitt fyrsta skref að leggja mál barnsins undir sérkennara eða deildarstjóra sérkennslu. Foreldrar eru látnir vita af áhyggjum starfsfólks og þeir hafðir með í ráðum um framhaldið. Málið fer oftast í gegnum nemendaverndarráð þar sem sitja venjulega skólastjóri/aðstoðarskólastjóri, skólahjúkrunarfræðingur, námsráðgjafi, deildarstjóri sérkennslu og oft sálfræðingur, félagsráðgjafi og/eða sérkennsluráðgjafi frá þeirri þjónustumiðstöð/skólaskrifstofu sem vetir skóla barnsins sérfræðiþjónustu. Ráðið ákveður hvort vísa eigi máli barnsins til frekari athugunar. Tilvísun er almennt send til þeirrar þjónustumiðstöðvar eða skólaskrifstofu sem veitir skóla barnsins sérfræðiþjónustu.
Eftir að tilvísun hefur borist þjónustumiðstöð eða skólaskrifstofu er nánari upplýsinga leitað hjá þeim aðilum sem þekkja barnið best, yfirleitt foreldrum barnsins og kennurum. Að minnsta kosti einn fagaðili þjónustumiðstöðvarinnar eða skólaskrifstofu hittir barnið sjálft. Eftir viðtöl og greiningu á vanda barnsins fá foreldrar og starfsfólk skóla gjarnan leiðbeiningar og ráð um hvernig best sé að taka á vanda barnsins og málinu fylgt eftir af fagaðilum frá þjónustumiðstöð eða skólaskrifstofu. Ef athugun hefur leitt í ljós að barnið þarf á meðferð að halda eða tiltekinni þjónustu er leitað eftir viðeigandi meðferðarúrræðum fyrir barnið og máli barnsins komið í þann farveg að það fái þá þjónustu sem það þarf á að halda. Foreldrar sjá oft um að sækja um úrræði sem fagfólk hefur mælt með. Í sumum tilfellum þarf nánari greiningu á vanda barnsins. Þeir aðilar sem unnið hafa athugunina hjá þjónustumiðstöð eða skólaskrifstofu vísa þá málinu áfram til Geðheilsumiðstöðvar heilsugæslunnar, Barna- og unglingageðdeildar Landspítalans, Ráðgjafar- og greiningarstöð, Heyrnar- og talmeinastöðvar Íslands, barnageðlæknis, talmeinafræðinga eða annarra fagaðila.