Fimiþjálfun sem byggir á kennslu eins og Precision Teaching (PT) er leið til þess að æfa færni og mæla árangur kennsluaðferðar. Grunnhugmyndin með PT er að nemandi nái fimi í grunnfærni til þess að hægt sé að blanda ólíka færni í nýja hegðun sem er flóknari og er samsett af mörgum færniseiningum. Það er því hægt að kenna alla mögulega flókna hegðun með því að kenna ólíka grunnfærn fyrst. Þetta er mikilvægt í kennslu þar sem truflun í einni grunnfærni hefur áhrif á það hversu vel nemandi getur framkvæmt flókna færni. Ef barn les til dæmis hægt og gerir margar villur þá gæti verið sniðugt að skoða hvort barnið sé fimt í grunnfærni lesturs, til dæmis aðgreiningu hljóðunga. Ef barnið er ekki nógu gott í að aðgreina hljóðunga þá er mögulegt að láta barnið æfa þá grunnfærni þar til fimi næst. Eftir það ætti lestrarnámið að ganga betur.
Þegar PT er notað er fyrst athugað hvar námsmaðurinn er staddur í námi sínu og ákveðið hvaða færni skuli kenna honum. Sú færni sem er kennd verður að vera mælanleg og endurtakanleg svo mögulegt sé að skrá hana oft. Nemandum er síðan sett markmið og hegðun hans síðan mæld frá upphafi kennslu og þar til færnin er komin í toppfærni. Eftir að toppfærnin næst þá er nauðsynlegt að halda áfram að byggja upp hraða og nákvæmni, þannig byggist upp fima færni.
Einkennisorð PT eru þau að nemandinn hafi alltaf rétt fyrir sér. Í PT bert kennarinn því ábyrgð á því hvort nemandinn læri nýja færni eða ekki, þ.e. ef nemandi hefur ekki getað lært ákveðna færni er ekki gert ráð fyrir að nemandinn eigi í erfiðleikum með að læra þessa færni heldur þurfi að breyta kennsluaðferðinni til þess að nemandinn geti lært hana. Þegar nemandanum tekst ekki að læra nýja færni er þess vegna gert ráð fyrir að eitthvað sé að kennsluaðferðinni sem verið er að nota en ekki nemandanum og því þurfi að breyta kennsluaðferðinni til þess að hafa áhrif a hegðun nemandans. Í PT eru notuð hröðunarkort til þess að meta hversu gagnleg kennsluaðferðir eru fyrir nemandann. Þess er krafist af nemandanum að hann æfi sig daglega og mæli sjálfur frammistöðu sína og skrái í hvert skipti. Hver nemandi þarf því að skrá hjá sér tíðni svörunar sinnar, þ.e. hversu oft hún kemur fram á ákveðnu tímabili, á þessi sérstöku hröðunarkort. Hröðunarkortið sýnir hraða framfara.